Frank og Mia

Dagarnir þjóta hjá á ógnarhraða. Janúar sem átti að vera ó svo kósí með rólegheitastundum og afslappelsi, hefur liðið hjá í annríki og asa. Próftíðin er oft notaleg, ég er yfirleitt með fá próf og get tekið mér góðan tíma í undirbúning vorannar. Sem veitir nú ekki af því vorönnin hjá mér er yfirleitt mun erfiðari en haustönnin og pensúmin á komandi önn eru fjögur. Námskrárvinnan hefur tekið yfir allar auðar stundir á vinnutíma og líka oft á kvöldin. Á mánudaginn byrjar ný önn og valáfanginn minn spennandi, sem ég ætlaði að gera ógeðslega flottann og skemmtilegan, er bara rétt að byrja að mótast. Áfangalýsingin er svosem að verða klár en enn á ég eftir að undirbúa og lesa svo ógnarmikið.

Kennarar geta verið paranaujaðir og ég er búin að vera að leita að glósum í faginu sem ég er að fara að kenna. Oft er það þannig að nemendur fylgjast ekkert með þegar kennarinn er með innlögn því þeir hafa nælt sér í ítarlega glósupakka einhversstaðar á netinu. Fann nú ekki glósupakka fyrir afbrotafræðina en fann þessa síðu: http://www.cheater.com/ 

Ja hjarna hjar segi ég nú bara.

Kuldaboli er mættur á ný, fór á hundasvæðið í gær með Týruljúflinginn og skalf úr kulda í norðangarranum. Datt svo næstum því á hausinn í dag, svona tíu sinnum. Fór í klippingu og kom nánast grátandi út, var svo hræðilega óánægð. Ég lít út eins og fimm ára karlmaður með koppaklippingu. Æðislegt. Þori varla að láta sjá mig utanhúss. 

En stígvélin sem ég keypti í gær bæta þetta allt saman upp og svo er planið að blóta þorra á laugardaginn. Tók smá upphitun í gærkvöldi og fór út með nokkrum útvöldum vinnufélögum. Mojito stendur alltaf fyrir sínu en djöfulli er hægt að rukka mikið fyrir einn nánast áfengislausan drykk!

Ding Dong Dei!

Ég skil ekki af hverju tölvupóstforrit eru ekki með þeim fítusi að geta gert CANCEL, ef maður gerir mistök í póstsendingum! Ég fékk póst í dag sem ég átti ekki að fá og gat alveg fundið hnútinn í maganum á þeim sem sendi póstinn. Um voru að ræða "viðkvæmar trúnaðarupplýsingar". Las ekki póstinn - enda stóð "Sæl xxxxx" svo ég sá strax að þetta var ekki til mín. En það voru miklu fleiri sem fengu póstinn og örugglega einhverjir opnað.

Ég er oft að hugsa um þetta í vinnunni, er farin að sýna ýtrustu varkárni áður en ég ýti á send. Bíð líka yfirleitt í 10 mínútur með að svara tölvupóstum sem mann langar að svara strax í einhverjum æsingi... Maður veit aldrei hvort póstur sem maður sendir er áframsendur eitthvert annað, hvort einhver sýnir hann, hvort hann lendir hjá röngum aðilum eða maður einfaldlega sendir á allir í staðinn fyrir alli.r.

 Ég vil fá þennan fítus. Í þessu tilfelli í dag uppgötvaðist þetta nánast um leið og þá hefði viðkomandi getað "cancelað" póstinum og pósturinn horfið úr pósthólfum þeirra sem ekki áttu að fá hann. Þetta var víst til í einhverju póstforriti fyrir nokkrum árum en ekki lengur - held ég.

V

Kannski ekki eins hræðilegt og það hljómar. Húsbóndinn á heimilinu er aldeilis uppátækjasamur þessa dagana. Hann tók upp á því á þriðjudaginn að hætta að borða allt nema grænmeti og ávexti. Ætlunin var að "fasta" í alls þrjár vikur, grænmeti og ávextir í eina viku, vatn í eina og svo aftur grænmeti og ávexti til að borða sig upp aftur. Eftir þrjá daga af því góða ákvað hann að breyta aðeins um stefnu og keypti safakúr í Heilsuhúsinu.

Við erum að tala um manninn sem fær sér iðulega egg og beikon í morgunverð á sunnudögum. Ég hafði litla trú á honum og taldi víst að hann héldi aðeins út í sex klukkustundir. Dóttirin bætti um betur og sagði að hann gæti þetta í einn dag. Hann hefur með þessu sýnt þvílíka staðfestu og dugnað, ætli hann eigi ekki skilinn tvöfaldan beikonskammt um næstu helgi. 

Þessi safar eru náttúrulega bara viðbjóður og það sem verra er, maðurinn keypti einn skammt handa mér líka. Veit ekki hvað í andskotanum ég er búin að láta plata mig út í. 

Og sonurinn orðinn veikur!

over and out!

V

Á morgun koma nokkrir átta ára grísir í níu ára afmæli frumburðarins. Hún hefur sterkar skoðanir á veislunni sinni eins og flestu öðru - það skal vera afmæliskaka sem lítur út eins og píanónótur, það skal vera rice crispies kökur, ávextir og pizza og svo er alltof barnalegt að vera með einhverja plastdiska. Planið er að fara í heimatilbúið Alias í léttari kantinum, borða á sig gat og leika sér svolítið.

Fyrir afmælið þurfti að taka herbergið hennar í gegn og breyta uppröðun á húsgögnunum. Já, það stendur sko mikið til!

Húsbóndinn fór í dag á útsölur og náði að kaupa tvennar Levi´s gallabuxur á 10 mínútum! Þær voru á 50% afslætti svo hann gerði góð kaup. Ég væri til í að geta skroppið á útsölur í 10 mínútur og komið heim með svona góðan feng!

Ég er ekki viss um að ég treysti mér til að kjósa í næstu alþingiskosningum. Það er svo gríðarlega mikil og tímafrek vinna að fara í gegnum allar þær upplýsingar sem þarf að fara í gegnum til að geta tekið upplýsta og vel rökstudda ákvörðun. Það þarf að fara vel og vandlega yfir stefnuskrá nokkurra stjórnmálaflokka. Gefum okkur að þeir séu sex. Það þýðir 120 frambjóðendur sem maður þarf að vega og meta. Hvernig munu þeir bregðast við hinum ýmsu málum sem kunna að koma upp, ætli þeir séu trúverðugir? Maður þarf að sjálfsögðu að googla þá og kíkja á Íslendingabók, krosseignatengsl og svo framvegis, til að geta tekið afstöðu hvort þeim sé treystandi. Menntun og fyrri störf skipta að sjálfsögðu máli og svo félagsstörf og fjölskyldustaða.

Ég er að spá í að taka mér frí frá vinnu í mánuð fyrir næstu kosningar til að geta tekið upplýsta afstöðu, þetta er svo mikil vinna. Geta mennirnir ekki bara ákveðið þetta sjálfir svo þjóðin þurfi ekki að standa í svona helvítis brasi?

over and out

Mia