Nýr mánuður og ný færsla

Sit uppi í rúmi, á gistiheimilinu Alba í Eskihlíðinni. Stakk af til Reykjavíkur í gær ásamt nemendum og tveimur samkennurum. Yndislegt að göslast í rútu í rúma fimm tíma, með langþráðu pylsustoppi í Staðarskála

Framundan er mjög svo spennandi árshátíð saumaklúbbsins. Hún verður haldin á Grettisgötunni á laugardagskvöldið og þemað er pallíettu-glitter. Ég ráfaði um Kringluna í dag og leitaði að pallíettusíðkjól á viðráðanlegu verði en fann barasta engann. En sé að það er um auðugan garð að gresja því það eru pallíettuföt allsstaðar. Mátaði þennan gasalega fína jakka sem var varla úr neinu öðru en pallíettum, gasalega lekkert. 

Ég fæ grænar bólur þegar minnst er á  svona þemapartý þar sem maður þarf að dressa sig upp sem eitthvað faboulous kvendi eða glamour eða eitthvað í þeim dúr. Er þema-félagsskítur. En ætla að reyna að taka þetta þema í bakaríið og finna mér síðkjól. Helst með 100 mismunandi litum pallíettum. Kannski er hægt að fá pallíettuskó líka? Og húfu?

Leit líka við í Seðlabankanum í morgun. Það var mjög hressandi. Merkilegt hvað Reykvíkingum finnst merkilegt að hitta Akureyringa, það er alltaf komið fram við okkur eins og við séum sérþjóðflokkur eða sýningardýr!

ding dong dei

Það er kominn föstudagur og það er vel

Dagarnir þjóta hjá á ógnarhraða. Janúar sem átti að vera ó svo kósí með rólegheitastundum og afslappelsi, hefur liðið hjá í annríki og asa. Próftíðin er oft notaleg, ég er yfirleitt með fá próf og get tekið mér góðan tíma í undirbúning vorannar. Sem veitir nú ekki af því vorönnin hjá mér er yfirleitt mun erfiðari en haustönnin og pensúmin á komandi önn eru fjögur. Námskrárvinnan hefur tekið yfir allar auðar stundir á vinnutíma og líka oft á kvöldin. Á mánudaginn byrjar ný önn og valáfanginn minn spennandi, sem ég ætlaði að gera ógeðslega flottann og skemmtilegan, er bara rétt að byrja að mótast. Áfangalýsingin er svosem að verða klár en enn á ég eftir að undirbúa og lesa svo ógnarmikið.

Kennarar geta verið paranaujaðir og ég er búin að vera að leita að glósum í faginu sem ég er að fara að kenna. Oft er það þannig að nemendur fylgjast ekkert með þegar kennarinn er með innlögn því þeir hafa nælt sér í ítarlega glósupakka einhversstaðar á netinu. Fann nú ekki glósupakka fyrir afbrotafræðina en fann þessa síðu: http://www.cheater.com/ 

Ja hjarna hjar segi ég nú bara.

Kuldaboli er mættur á ný, fór á hundasvæðið í gær með Týruljúflinginn og skalf úr kulda í norðangarranum. Datt svo næstum því á hausinn í dag, svona tíu sinnum. Fór í klippingu og kom nánast grátandi út, var svo hræðilega óánægð. Ég lít út eins og fimm ára karlmaður með koppaklippingu. Æðislegt. Þori varla að láta sjá mig utanhúss. 

En stígvélin sem ég keypti í gær bæta þetta allt saman upp og svo er planið að blóta þorra á laugardaginn. Tók smá upphitun í gærkvöldi og fór út með nokkrum útvöldum vinnufélögum. Mojito stendur alltaf fyrir sínu en djöfulli er hægt að rukka mikið fyrir einn nánast áfengislausan drykk!

Ding Dong Dei!

 

 

Afmæli

Á morgun koma nokkrir átta ára grísir í níu ára afmæli frumburðarins. Hún hefur sterkar skoðanir á veislunni sinni eins og flestu öðru - það skal vera afmæliskaka sem lítur út eins og píanónótur, það skal vera rice crispies kökur, ávextir og pizza og svo er alltof barnalegt að vera með einhverja plastdiska. Planið er að fara í heimatilbúið Alias í léttari kantinum, borða á sig gat og leika sér svolítið.

Fyrir afmælið þurfti að taka herbergið hennar í gegn og breyta uppröðun á húsgögnunum. Já, það stendur sko mikið til!

 

Húsbóndinn fór í dag á útsölur og náði að kaupa tvennar Levi´s gallabuxur á 10 mínútum! Þær voru á 50% afslætti svo hann gerði góð kaup. Ég væri til í að geta skroppið á útsölur í 10 mínútur og komið heim með svona góðan feng!